打從十幾年前老竇同姑姐喺養和做咗LASIK之後，佢哋話好似重生咁。自此後我一直知道有一日我都會做矯視手術，但係拖咗好多年, 今年二月我終於做咗LASIK！決定做手術嘅原因係：timing啱。適逢dodgeball season完咗，到二月尾先開始。有足夠時間休養而唔影響我打波嘅schedule，所以我同Junk Shot captain相約做咗去！
而家喺香港做LASIK實在好普遍。選擇好多。我求其問吓都有好幾個friend做過，仲比埋資料我添。基本上有三個選擇：1醫院package。養和最好口碑，亦都最貴。2矯視中心。全港好多間，好多都做到好似睇街症咁，非常普通。亦因為普及化，啲technicians日日做，手勢純熟，出錯機會亦相對少。3 specialist：專科醫生幫你做。通常都係人哋介紹，亦等於喺醫院揀指定醫生。有啲醫生喺指定醫院做，有啲喺眼科中心做。我聽埋seminar之後決定喺香港激光矯視中心度做。有幾個朋友都喺哩度做過，效果都滿意，而且ok平！
手術前要先檢查眼睛。睇吓適唔適合做手術。驗眼同手術前一星期都唔可以帶軟con，硬con則需要停帶三星期。為方便，我schedule咗手術為驗眼之後一日，所以只需要停帶con一星期。如果驗眼後一切正常，第日就可以即做手術喇。
二月一號驗眼，二號做手術。本來唔驚，去到手術室就開始緊張。過程唔耐，麻醉咗其實一啲都唔痛。結果一切順利。我想講嘅其實唔係個手術，而係手術後嘅護理。兩星期內瞓覺時都要黐住兩塊護眼罩，一個月唔好游水，唔好局sauna，唔好做球類運動... 哩啲都無問題。最大鑊係：唔。可。以。化。眼。妝。我真係唔記得我幾時開始劃眼線搽mascara！我天生細眼，唔化眼妝真係有人話我似林憶蓮架！一星期後復診時再問醫生我幾時化得妝，佢嘅答案令我好失望。結果，我真係一個月無化妝。閉關一個月，無去蒲。江湖盛傳巴黎珍收咗皮，我可以話你聽哩單嘢喺真嘅。
言歸正傳，手術後都有兩個幾月喇！好享受一瞓醒就見到嘢，沖涼時唔會用錯護髮素當洗髮水，夜晚唔使除con瞓！早就應該做啦！！！亦都好好彩，我並無眼乾。可能我一直乾慣啦，而家同之前無乜分別。奉勸各位在老花未出現前好快啲做咗去啦！早做早享受呀～
在仆過739次街之後，終於明白關於愛情的小道理 59
10 months ago
Posts
