Meet Up 義工團探訪老友記第一擊之元洲邨

第一次Meet Up。第一次探訪老人家。第一次見識老人公屋單位。第一次feel到互動的窩心。

雙下巴係我朋友圈內義工的始祖，所有Meet Up呀Hands On 呀都係佢介紹我嘅。上兩個禮拜突然心血來潮上Meet Up睇，見到有探訪老人活動就好似呼喚著我般不能抗拒邀請，膽粗粗就RSVP咗。跟住雙下巴又二話不説又同我去。

到Meet Up當日，一班唔識嘅人全無記認係相約地點集合。企係度周圍望好似等緊人嗰啲就係團友嘞。一齊行去老人中心聽社工briefing。Basic的不能網上公開與受訪者相片呀，唔好話"我下次再來找你"呀，有咩要注意等等。之後兩個人一組，安排探訪地址，攞有心人士贊助的月餅生果就出發。

第一站係探一對年老父女。去到時只得老伯喺屋企。佢個女去咗執紙皮。伯伯話佢個女日日都出去，自力更生好勤力！老伯好開朗，好叻仔！最記得佢話呢度d街坊好幫忙，又會日日約飲茶一人請一日。每日一早都會三五成群落樓下樹下乘涼。又話電話騙䅁呃唔到佢。

第二站嘅"婆婆"簡直係上天派來同反做我個義工嘅天使！姐姐睇落似五十幾歳，原來有七十。日日行四五個鐘頭山，好多活動又有班啱key朋友。比巴黎珍更巴黎珍，樂天過樂天熊仔餅！佢以前喺一間學旁邊賣咗廿年豬腸粉，睇住好多學生哥長大。又話以前嘅香港人很包容，小販都有生存空間。只要肯做就可以為生。仲叫我地要善待人，多d包容開心面對所以嘢。總之佢完全開解咗我！我地走嗰陣不停多謝姐姐，佢由頭至尾都超好笑容。總之好high!

最後一站係一個老婆婆，佢係三個之中最灰嘅。行動不太方便，嚟開門時都幾吃力。言談間一心唔想麻煩人，一個人住一切從簡。牆上有好多年輕時嘅靚相，的確好靚。原來婆婆以前係磨Del！有好多嘢唔記得但係好記得想當年喺彌敦道一間叫紅棉嘅影樓做生招牌。

探訪完後take比give更多！要互助包容同埋記住令自己一世都開心嘅事。