生活點滴

上星期六有幸再為Amy Magazine拍一個睇畫嘅Feature。本來以為好似上次咁、都係學吓睇畫。估唔到今次有非常意外嘅收穫！

今次去嘅Gallery個主題係將要清拆嘅灣仔市集。每一幅作品背後都有一個故事。Gallery內的三位熱心的保育人士仔細地講解每一幅作品、細心地講說每一個活生生嘅故事。


相中左上角嘅係鷄蛋檔主蘇先生。佢喺太原街擺檔已經幾十年，養活一家大細。而家已經有九個孫啦！右邊嗰兩幅作品喺攝影師集齊市集嘅小販，於巿集中心合照留影。幾十年街坊，可能都係第一次影合照。亦都好快無機會再聚啦！


內衣檔嘅大眼檔主。呢檔生意由檔主嘅媽咪做起。小小灘檔，可能係兩代人嘅整個世界。意義深重！


Lesley 細心傾聽社會關注人士嘅講解。完來這個漂亮的Gallery係業主慷慨借出作為展覽場地，而且分文不收！目的係想引起社會關注。保留本地文化！業主嘅熱誠，關注小組不惜工本地自製小冊子，和懾影師自費的作品、、、一切都令我非常感動！實在太有「哈慈」啦！！

睇完作品展之後，我哋一行八人去到實地感受巿集文化！


當日下着雨，所以好多檔灘都遲開檔。去到嘅時候其中一檔賣玉器嘅小販正在開檔。檔主要將每一件貨物一條一條咁掛起。如不幸地遇上趕盡殺絕嘅食環人員查牌就大穫啦！因為檔鋪要有貨有人賣先算開緊檔。個人整緊貨係唔算數嘅！而每個小販每月必須開足十七日。遇啱查牌未ready，嗰日就當你無開檔。一個月做唔夠十七日就會被另銷小販牌。以後想做都無得做！只係呢個巿集先至check得咁嚴。因為小販們唔肯走，會影響市區重建。


遇上鷄蛋檔蘇先生！佢好健談架！of course, 佢係我同鄉嚟架喎~ XD


大眼檔主與保育姐姐討論緊小組最新消息。


今次去完呢個作品展之後，覺得市集嘅灘擋都好有文化氣息！你睇吓「孫記」幾咁artsy~


估唔到咁細個kwan kwan內可以充滿咁多人情味！充滿着生活嘅點滴！市區重建要小販們放棄幾十年嘅生活方色，搬到新建的街市內。鋪租貴十幾倍之餘人流亦會遠不及市集咁熱鬧！試問各位會唔會無那那走去行街市睇雜貨呢？但係平時行街都會望吓街邊小販掛出嚟賣嘅野。真係唔買都嚟睇吓呀！以前我對保育不聞不問。係覺得時代要不停改變。但係今次之後感受好深！有好多生活嘅點滴係好值得保留架！

http://www.streetmarketconcern.net/

Lesley's view: http://www.amymagazine.com/amyblog/sunlesley/2007/08/14/%e6%9c%89%e5%bf%83%e4%ba%ba%e7%9c%8b%e6%9c%89%e5%bf%83%e4%ba%ba/