我的家電愛情

你會收到另一半送的聖誕禮物、情人節禮物、生日禮物、週年禮物、端午節禮物嗎？通常收到D乜呢？首飾？手袋？錶？花？粽？以上嘅嘢我一樣都未收過！而最大機會收到嘅，應該係隻粽。無錯！我的另一半好唔浪漫，我哋嘅人生根本同浪漫扯唔上任何關係。我哋從來都無定期送禮嘅習慣。禮物當然有收過啦，不過打從第一份禮物開始就斷定以後我收禮物嘅路線！

N年前當我仲住係Reno嘅時候，當時仲係要去租錄影帶返屋企睇嘅年代。當年我收到佢送比我嘅第一份禮物：電視機。呢一部唔係普通嘅電視機！佢係一部已經絕咗種嘅電視連錄影機！方便我褒帶用嘅！想當年嘅流星花園呀，金装四大才子呀，真情呀，创世纪呀，+N套TVB劇都係用哩部電視睇架喇。

到搬咗出嚟住，要自己做家務。家務之中我最喜愛的就係吸塵喇！ 另一半好體貼地送咗第二份禮物比我，就係一部好正嘅吸塵機！講真，真係堅鐘意！其實係我要求一齊去買嘅，所以好鐘意。咁算唔算係佢送呢？

有次出trip唔見咗個電動牙刷，到咗情人節我提議佢送（買）返個比我。我地兩個都用得嘛，好實際！就屈個電動牙刷做情人節禮物啦！當時覺得好實際，而家諗返起其實一個牙刷兩個牙刷頭都嘅sweet呀～

啱啱聖誕節我哋招呼幾個朋友嚟屋企食飯。我好想親自下廚。於是買餸嗰陣就順手買咗個oven返去整lasagna! 算係我第一份聖誕禮物啦掛！的確，買咗部oven之後多咗喺屋企煮飯。雖然餐餐都係lasagna，但係越整越好食！仲諗住遲啲整蛋糕同cookies添！

最近去買電視，買完之後佢話想睇空氣清新機。無啦啦睇咩空氣清新機呢？佢話因為我成日氣管敏感，想買部比我。堅窩心喎！家電的確令我更黐家。完全被domesticated咗！係未人大咗呢？開始懂得appreciate佢極不浪漫嘅禮物。唔係收花香水首飾，但係收到佢嘅心意。