2015大事會顧‧下集

要多謝嘅人實咗太多，但係有幾位真係都想多謝多次。

老公，老竇，姑姐。媽咪唔喺香港，你哋就係我最親嘅人。特別係姑姐，小坐月時姑姐幫我周圍去買石崇魚買家美雞，山長水遠攞嚟我屋企，仲叫埋外援嚟煮飯比我食。堅感動！你第時老咗我會陪你去睇醫生架！

我想多謝Clarice，咁啱佢又坐緊月，當時又住得好近。佢share咗好多資料比我。其實最重要係佢陪我傾計，一齊食lunch。心地好好又同我溝通到嘅朋友。真係啱晒時間地點人物上天派比我嘅一個天使。

天使二號仲有瑪蓮娜，一個好耐無contact嘅老朋友。佢知道我要休養後主動contact我分享養生心得。蒸腳燉湯嘅詳盡資料，係好warm嘅。

當然仲有我愛嘅flask mod，TH，bitches，幾個好好嘅同事，一班好有緣份識到嘅QM姊妹。每日聽我呻，唔只當時，而家都係。

當中亦都有失望嘅，以為係好好好好嘅朋友，但約咗又甩底。同佢講我好depress好失望，之後不了了知。一直無聯絡。我之後有reach out過，但係都無回音。只能說，人大咗好多事唔使強求。希望有緣嘅第時會做得返朋友。

就係咁，坐喺度一個人會無啦啦喊嘅日子好快過去。好快又開始日日飲中藥，定期去針灸，勤浸腳，多運動，介生冷嘢，食supplements。休養三個月後又再挑戰IVF。好似心願未了咁，心急去試，唔想再等。

* * * * *

2015年9月尾開始從新出發，再開始打針。有上次經驗，今次定咗好多，唔怕針唔怕副作用。頭暈頭痛無胃口腫脹無難度。但係打針反應唔理想，一直都只係得三粒卵泡有反應，其他太細無乜用 (正常通常有十幾粒)。





















到抽卵當日，醫生幫我盡抽，都係得6粒。講明有啲好細應該無卵用。我明。人哋通常有十幾粒，會有六成左右培植成胚胎，就有大概十個八個機會放胎等成功著床，每次成功率得30％。我心諗，如果我有三四個胎比我放就好了。返屋企休息兩日後返醫院放榜。

放榜日，一早同老公去到醫院，見姑娘，安排放胎。胚胎係有5個grade嘅，睇吓分裂到幾多個cell，分得靚唔靚仔而定。入房見姑娘，姑娘好平靜咁話我哋知有一個胚胎。係，係得一個。仲要係grade 4胎，唔多合格的。姑娘叫我唔好唔開心，有好多grade 4都會成功嘅，佢好珍貴，因為我得一千零一粒。去樓下食啲嘢就安排放胎啦。

又可能係打針太多荷爾蒙影響，情緒有啲失控。食早餐時我忍唔住一路食一路喊。點解做咁多嘢成績都係咁差？得一粒唔合格嘅胎。Grade 1 應該有6-8個cells，我呢粒有3個cells。正常人做IVF有十個八個機會先有30％成功，我得一個唔合格嘅機會。好似已經判咗死刑咁。忍住唔爆喊，唔想影響老公心情。老公見到同我講，唔好咁，我哋要對呢粒胎有信心，因為佢係我哋嘅！上到病房，我都仲喊緊。同房隔離床嗰太太安慰我唔好喊，一陣驚親bb。佢話有得放已經好好，今朝有個放榜太太應該無得放，係大堂喊到好慘。又諗起老公話要有信心，慢慢冷靜返。放胎手術好快。推返我返房個阿姐叫我生咗返去請佢食薑醋，好好人！醫療團隊能夠為我做嘅就去到放胎呢一步。要等兩個星期先知結果。著床係好奇妙嘅事，要睇佢自己造化。

呢兩個星期係人生最漫長嘅兩個星期。好易會亂諗嘢。又打定輸數睇其他IVF要幾錢，我負唔負擔得起做第二次。早晚塞藥，有啲感覺就以為m到自己驚自己。心理壓力好大。諗起老公話要有信心，呢粒胎好珍貴，我開始叫佢做阿珍！好不容易到咗可以驗孕嗰日啦！屋企有一枝好耐之前買落，一直無機會用嘅驗孕棒，攞出嚟試，可能擺得太耐唔work！！！當日返工前買咗枝新嘅，急不及待係公司試！好friend個兩三個同事知道嘅都燈我好好好緊張！結果係，我真係中咗！喊到我呢。今次係開心喊，平復咗先同同事報喜。佢哋衝咗入廁所我哋開心到個個都喊晒！佢話自己有咗都無咁激動！



就係咁我就正式有咗黃珍珍啦！我知道我真係好好彩。好多人試好多次IVF，無原因無解釋都唔成功。有好多胚胎又可能無一個著床。一次又一次嘅心理壓力比皮肉之苦更大。中獎之後又有好多關要過。懷孕的確又係另一個課題。好感恩今日嚟到38週。珍珍還未出世，一日未見到佢一日都仲會擔心。希望珍珍叻女啲，要平安來臨。