我係楊利偉

嘟嘟...嘟嘟... 電話響...
「喂！老竇，乜事呀？」
「喂！你買咗滑雪褲未呀？」
「我有啦。不過想買過件新嘅。我今個weekend會去睇架啦！」
「你唔洗睇啦！我買比你啦！好靚架，最後一套囉！唔買就無架啦。」
「但係我想自己去睇吓先喎！」
「唔洗啦！真係好靚喎！我而家比錢架啦，聽日攞比你啦。」

收線之後有種不祥之兆。即刻打返比老竇...
「喂！都係唔好買啦。我想自己睇吓先呀！」
「比咗錢啦！唔洗擔心喎，實啱你着。全套紅色，好靚架！」
「吓？？？買咗啦？？幾錢呀？」
「唔好理啦。仲之你會唔捨得自己買，我買比你啦。」
「吓？？？？咁即係幾錢呢？」
「三千拎啦。好靚架！」
「WHAT????????? 咁X貴?????我又唔係成日去滑雪！唔好買啦！！！」
「都話比咗錢lok。我聽日比你啦！」

今朝瞓醒，忽然想約飲茶。打比老竇...
「飲茶囉？！」
「好呀！我順便攞埋套甲那衣比你！」
「乜嘢甲那衣呀？」
「套滑雪甲那衣呀！真係越睇越靚！好正喎！！」
「... 唔... 陣間見啦。」

hum... 陣間如果真係唔鐘意，我比個乜嘢反應佢好呢？呢個可能性都頗高吓架喎... 可能件衫真係靚呢！唔買都買咗啦，唔好諗咁多啦。
飲完茶，攞住件鮮紅戰衣返屋企即刻試上身...

各位觀眾！我係楊利偉！！！Wahahahaa... 件甲那衣真係好sharp！個膊好闊吓，仲有兩大個shoulder pads 添！由山頂碌落山一定比人見到。OMG! 月尾去滑雪一定要着啦。唔着唔孝順！OMFG!