Birthday Partays

生日會一: 大奀完全斷片大會

大奀生日, 我晨早就book左蠔涌bbq場。 歷年來我地去過呢個場n次。 此燒烤場春色綠野景致艷雅, 有大草原可以玩飛碟， 茅屋又有度假feel， chill爆！ 百令蚊all-u-can-b的確好抵玩！ 生日會前一日我收到bbq場電話：

蠔涌bbq場負責人(簡稱蠔人)： 唔該蘇小姐呀!
蘇小姐： 我係!
蠔人：唔好意思呀! 我係蠔b場打呢架。
蘇小姐： (懶醒搶答) 啊! 係呀! 我尋日入咗$500訂金比你啦。 未fax張入數紙比你添！
蠔人： 啊! 唔係呀! 我係想話你知， 我地唔做啦！ 真係唔好意思呀！
蘇小姐： 吓????????? 但係你前幾日仲叫我比訂架喎！？
蠔人： 真係唔好意思呀! 其實我地接手無耐, 發現原來上手好多牌都無架。 我地同律師商量過之後啱啱決定唔做啦。 你可以比返個銀行號碼我， 我入返$500比你啦。
蘇小姐： 吓?!!! 唔好搞笑啦！ 我聽日開party你今日執笠??????
蠔人： (都係嗰句) 真係唔好意思呀！

蠔b場執笠， 我仲有一日時間book過另一個場。 結果book咗位於市區嘅賓賓會！ 任飲任食都只係百令蚊。 重點係啤酒都係任飲架!!! 自攜酒精飲品另收開瓶費。 於是我地開咗幾瓶， 再shotgun咗幾輪啤酒... 當晚大奀小姐十點鐘就開始斷片， 一直斷到三點幾。 斷片期間搞笑事件多不勝數。 包括喺賓賓會扮賓賓跳舞。 喺翠華調戲男侍應。 Prive內 flip off d 比佢撞到嘅途人...

雖然大奀小姐完全唔記得自己個birthday party 做過d乜。 但係相片同video clips 話佢知， 我地嗰晚玩得好開心！



為咗大奀可以過一個有記憶嘅生日， 我地幾日後等佢醒返， 再約佢去食飯。 去咗嘉享灣附近一間叫＂鬍鬚伯伯＂嘅餐廳食飯。 九道菜， 每道跟一杯酒。 雖然無斷片， 但係九杯酒之候大家都好tipsy！ 呢間餐廳好值得推介！！ D野食好好味呀！！！ 每杯酒同每道菜好襯。 你都去試下啦！

九碟九杯好佩搭，

中菜變得好型格！




生日會二: BFF的生日派對

BFF一向低調， 約埋三五知己食餐便飯。 壽星女鐘意食prime rib， 所以去咗Lawry。 壽星女眼闊肚窄叫咗一塊重型牛扒， 七成熟。 一上到枱知道一定食唔落。 所以同亞威對換咗佢嗰塊中型五成熟靘扒。 亞威對住塊太熟prime rib， 食食吓爆咗句： 原來prime rib即是牛腩！XD

雖然BFF低調，但係佢班friend唔係呀嘛！結果咪又係去咗clubbing囉。

Freestyle喪跳一整晚，

老蘭真係好好玩！

生日會三：Hassan的浴袍團！

Hassan個女友花盡心思，幫佢搞咗個surprise dinner！約好一班friend預先喺餐廳等佢。佢一行入門口，我地即放紙炮，當然有一齊嗌＂surprise＂啦！場地佈置得好靚，巨型＂３０＂波波，吹ＢＢ，花圈...

當晚個theme係浴袍。我地一班浴袍團係咪好正呢？

食飽飯，我地一行十幾人著住浴袍浩浩蕩蕩行去上環。Join埋另外兩位壽星開party。幾十人mix & mingle 場面好熱鬧呀！Sweet女友仲訂咗個刻咗＂３０＂字樣嘅冰雕。個頂可以倒shot入個冰雕度，喺下低飲返。冰涼可口！

上環有班浴袍團，

爭住玩冰雕噴泉。

Happy birthday guys! xx