亞燦的故事

噚晚上咗第一堂啦! 數數手指, 原來我8年無拉過大提琴啦!! 今次學返真係要多謝Lesley。 唔係佢lau我一齊學嘅話, 我個cello都唔知會喺屋企ou都幾時。可能ou到生蟲都無人知. Lesley 同我講, 我地嘅相遇係命中注定架~ 大家都係學到grade3就無學。 而家咁大個人先至學返, 如果無個伴我諗我會唔好意思自己走去學lor。努力呀! 我地一定可以學到grade5,6,7,8 架~



以前拉school orchestra嘅同學仔都會幫自己件樂器改名. 我都幫我個cello改咗個好貼切嘅名。各位觀眾，佢叫亞燦！佢喺中國出世，喺命運安排之下被人賣咗嚟香港。亞燦有一般土產嘅特色，就係有啲貨不對版。明明話自己係個size 4/4嘅大提琴，但係就比真正full size嘅大堤琴瘦少少, 一定係佢貪靚學人減肥啦！十三年前被我老竇以超低價二千幾蚊買咗返屋企, 我用咗三年唔夠就被我遺棄。亞燦一直留喺香港嘅雜物房，過咗十年不見天日嘅日子。我就喺美國另覓新歡。佢有佢嘅生活, 我有我嘅忙碌。直至噚晚，亞燦終於有機會做返一個會出聲嘅大提琴啦。以前教我個missy話過，你個琴就好比你男朋友, 你要珍惜佢，同佢經歷風雨，一齊成長。噚晚重遇亞燦，就好似返兜十年無見嘅舊男友一樣, 感覺唔陌生，但係大家都變咗啦, 亞燦把聲好吵，四條弦太舊吧！支弓變黃，甩頭甩骨，已經唔用得啦。換咗新弓，亞燦好似好少少。就係咁，我嘅回歸第一課又同亞燦一齊度過喇。


雖然同亞燦有些少感情。但係今次重遇，我更確切知道佢並非終身對象嘅才料。而家決定要繼續考五至八級，我更應該揾個新partner陪我奮鬥。所以我決定要買個新琴! 原來一個好嘅琴都唔平架... 不過既然決定要學, 不如破釜沈舟, 俾自己多一個堅持嘅理由。如果唔學就會"徙"咗個好琴啦... 亞燦，我希望你明白，亦希望你原諒我再次同你分手。


*Background 響起張惠妹嘅<<剪愛>>*


<= 亞燦